متى تتزوج الفتاة؟

دوشة كبيرة معموله علشان الموضوع ده

منتمين كتير للتيار الإسلامي بعضهم لا يريد تحديد للسن و البعض الآخر يريد النزول بالسن الى 14 أو 12 أو 9
و على الجانب الآخر ناس كتير و أنا منهم ، عاوزين سن الجواز 18 سنة على الأقل
علشان البنت هتكون نضجت جسديا و الى حد ما عقليا
يعني تقدر تشيل بيت
====================
طبعا بغض النظر عن ان العنوسة موجوده في البنات ما بعد العشرين و مش في الاعمار اللي بعض الناس عاوزها
و طبعا بغض النظر عن ان ما حدش بيحدد سن للزواج للأولاد ، كانهم ولاد الغسالة
تعالوا نحسبها من ناحية تانية
نتيجة الظروف الاقتصادية الصعبة ، يوجد تأخر للنمو في أطفال مصر
يعني البنت اللي عندها 14 سنة ، لو شفتها هتحس ان عندها تسع سنين
و طبعا لو تم السماح بالزواج عند سن 9 سنين
عائلات كتير هتضطر تجوز بناتها و هي عند 14 سنة مش 9 سنين كمان
يعني الفقير بس هو اللي هينضر
لان الغني غالبا مستواه العلمي و الصحي مش هيخلوه يوافق على حاجة زي كده
=====================

يا عيني على الفقير ، اللي ما بيلاقيش تعليم ولا صحة و هيبيع بناته تحت مسمى الزواج المبكر

---------------------------------------------------------------
أسيبكم مع الفيديو ده و اللي  يبين قمة السخافة اللي بقى فيها الشعب و هو بيسأل في برامج الفتاوى و هو بخصوص الموضوع ده برضه
https://www.youtube.com/watch?feature=player_embedded&v=HcJ9xHxI2nI

ماذا لو جاءنا اعصار "ساندي " ؟

لا قدر الله طبعا

هو أكيد احنا مش هنسميه " ساندي " ، ممكن نسميه الكارثة ، النكسة  أو أي حاجة

طبعا في الأول هنعرف الخبر من أي مصدر غير الإعلام المصري

بي بي سي أو الجزيرة أو سكاي نيوز 

هيتنشر الخبر كالهشيم في النار و هيتعمله هاشتاج على تويتر و صفحات على فيس بوك

لما الخبر يوصل الاعلام المصري هينزلزا أول خبر : الرئيس مرسي يتابع أولا 

بأول تداعيات الأعصار 

هيصرفوا 5 آلاف جنيه لكل متوفي و ألف جنيه لكل مصاب

هيجيبوا المحافظ بتاع المحافظة اللي اتأثرت و هو بيلف في مكان الخسائر 

 هتبدأ نقابة الأطباء بعمل حملة تبرعات 

بنك الطعام هينزل مكان الكارثة

تضارب  في عدد المصابين و المتوفيين

خسائر مادية مهولة في البنية التحتية نتيجة عقود من الفساد

السكان الذين أخلوا منازلهم سيظلون في مساكن الأيواء عشرين سنة

مزايدات من القوى السياسية 

تخاريف من بعض رجال الدين على أن ما حدث كان نتيجة المعاصي و الذنوب

........

==========

ما لفت نظري ان قناة مثل سي ان ان كل ما اهتمت به في عناوين أخبارها

عدد القتلى، عدد السكان المضارين نتيجة قطع الكهرباء

لم ألحظ أي حديث عن خسائر اقتصادية ، مزايدات سياسية رغم انهم في موسم انتخابات

تذكرت في مصر حين انقطعت الكهرباء لم يكترث احد بالمواطنين 

تذكرت حين انقطعت المياه عن مدينة شبين الكوم أكثر من 12 ساعة بما فيها المستشفيات داخل المدينة 

و تم تأجيل العمليات الجراحية و جلسات الغسيل الكلوي خوفا من حدوث كوارث طبية نتيجة نقص المياه

===================

فعلا، نحن نعيش في العصور الوسطى

القانون كــــــــــــافر و كراهية غير مبررة

كنت راكب مع سواق تاكسي و بعدين لقينا واحد ماشي عكس اتجاه السير

قلت : ما فيش احترام للقانون 

قال لي السواق : القانون كافر

قلت له : ازاي قانون المرور يبقى كافر؟

قال لي مش القانون ده معمول من دستور وضعي ، يبقى قانون كافر

========

ما يحدث في دهشور هو جريمة كراهية

كراهية المصري المسلم للمصري المسيحي

هل هناك سبب لهذه الكراهية؟

هل سرق المسيحيون أموال المسلمين؟

هل عذبوهم؟

هل أهانوا كرامتهم في دول الخليج؟

هل أذاقوهم المر في تحصيل لقمة العيش؟

هل تسببوا في نقص الرعاية الصحية لهم؟

هل المسيحيون هم من يقطعون الكهرباء؟

هل لوثوا مياه الشرب؟

هل هم المتسببون في أزمة المرور؟

هل هم المتسببون في أزمة غلاء الاسعار ؟

و لكن لهذه الكراهية سبب

مشايخ ما انزل الله بهم من سلطان

تركوا كل ما في مصر من فساد

و تفرغوا لمحاربة المسيحين و الشيعة و البهائيين

أيعقل ان يرفض شباب مصري مبدأ تعيين نائب رئيس مسيحي

بدعوى انه لا ولاية لغير المسلم على المسلم

هناك جريمة كراهية تحدث تجاه غير المسلمين في مصر

و تدريجيا ستمتد لغير المتفقين في الفكر من المسلمين أنفسهم

الحل ليس في جلسات التصالح الزائفة

الحل في تطبيق القانون

القانون لن يجبر طرف  على محبة طرف

و ليس مطلوبا المحبة بين الاطراف

المطلوب هو تطبيق القانون و سيادة العدل

الرئيس الطرطور

ثوار أحرار ، هنكمل المشوار

بهذه الجملة تغنى الرئيس مرسي و معه الآلاف في ميدان التحرير قبل يوم من تنصيبه رئيسا للبلاد

==============

طبعا كلنا شايفين الثورية في قرارات الطرطور

رئيس أكمل الشهر منذ تنصيبه و لم يختر بعد افراد حكومته

رئيس أصدر قرار لعودة البرلمان بعدها ألغت المحكمة الدستورية قراره

رئيس وعد بحل خمس مشاكل في مائة يوم، و مر شهر و لم يحل أتفه المشاكل و هي القمامة

فما بالك بالأمن

رئيس سعى لحل مشكلة القمامة بطريقة تشبه طريقة نشاط الاسر في المدارس و الجامعات

رئيس كانت أزمة البنزين مقتصرة على بنزين 80 و بنزين 90، امتدت بعد تنصيبه لتشمل كافة أنواع البنزين

رئيس اهتم بتوصيل الغاز الى غزة و لم يكترث بانقطاع الكهرباء عن ملايين المصريين

رئيس لم يكلف خاطره بتأمين المستشفيات التي تغلق تباعا في أنحاء الجمهورية بعد الاعتداءات المتكررة

رئيس ، يمكن من خلال أفراد جماعته ان تعرف القرارات التي يصدرها

رئيس منشغل بصلواته في المحافظات دون أن يكون لذلك أي مردود، سوى مزيد من التأليه

================

قد يتحجج انصاره بانه لم يأخذ الفرصة بعد

و يبدو أننا سننهي الفترة الرئاسية و الطرطور لم يأخذ فرصته

===========

الحمد لله اني قاطعت الانتخابات و ما انتخبتش الطرطور

مشاهد

هو : أنا عرفت انك مش مرتبطة و كنت عاوز أتقدم لك

هي- بعد نظرة الى السماء - : لا في حد تاني متقدم

هو : طيب ، سلام عليكو

صوت في الخلفية : هو خسارة فيها

=======

فلاش باك

هو : انا مش مقتنع بيها اصلها من مستوى اجتماعي أقل

أبوه: و لا يهمك يعني انت جدك كان وزير

أخوه: ما تستقلش بنفسك ، انت مش شوية

 ==========

مشهد قديم شوية

 

طرف خارجي: انا شايفة لك عروسة 

هو : طيب أشوفها و أفكر

بعد يومين

هو : العروسة كويسة انا هاسأل عليها

طرف خارجي تاني: أنا سألت لك على العروسة 

هو : و ايه النظام؟

طرف خارجي تاني: هما ملنزمين شوية

هو : مش سكتي ، ربنا يوفقها بعيد عني

 =========

مشهد أقدم

أمه : انا شايفه لك فلانه

هو : طيب أشوفها و أقول رأيي

هو : انا موافق

أمه : طيب هي عاوزة تشوفك

هو : ما فيش مشكلة 

هي : هو كويس بس انا مستنية أخلص دراستي الأول

 هو : دي بتزحلقني يا ماما، في ستين داهية