من أهم ما حدث لي في 2010

هو انا كنت كتبت اهم الاحداث اللي حصلت لي في 2009
و ما فيش مانع اكتب اهم الاحداث اللي حصلت لي في 2010

انبسطت جدا لما المنتخب فاز بكأس الامم

زعلت جدا من نتيجة البكالوريوس لانها على غير ما توقعت

كنت مبسوط اني بدأت الحياة العملية

اتصدمت في موت خالي الله يرحمه، و ده كان اسوء خبر في السنة دي
و بعد كده في موت جدتي الله يرحمها

كنت منشكح و انا باتفرج على كأس العالم
لان ده اول كأس عالم اتفرج على كل الماتشات
و كنت باتفرج بمزاج رايق لان البطولات اللي فاتت كان بيكون عندي امتحانات

استخدمت ويندوز 7

رمضان كان حر جدا

كنت باتسحر اندومي تقريبا كل يوم

كنت مبسوط جدا جدا لما اخويا خطب، ده احسن خبر

زعلت لما الاهلي طلع من البطولة الافريقية

بدأت اسوق العربية بعد معاناة استمرت طويلا

عجبني البوم ابو الليف

تقريبا بقيت مدمن لحاجة كده اسمها فتة بوريو
عبارة عن بوريو مخلوط بالايس كريم

زاد عدد اصدقائي على فيس بوك من حوالي 28 الى 56

بقيت اكثر تسامح مع الناس، مش عارف ليه

عموما هي ما كانتش احسن كتير من السنة اللي فاتت

يا رب السنة الجديدة تكون احسن

كل سنة و انتم طيبين

لمـــــــــــــــــاذا نتزوج

يمكن تقسيم الفترة من الحياة المتعلقة بالزواج الى ثلاث مراحل
مرحلة ما قبل الخطوبة
مرحلة ما بعد الزواج
و مرحلة ما بينهما
======
مرحلة ما قبل الخطوبة
دائما ما تكون المشاعر مضطربة
و غالبا ما يكون هناك قصة حب فاشلة لاي سبب من الاسباب
سواء رفض الاهل او خلعان الحبيبة

و غالبا بيكون هناك تسرع في اختيار الشريكة المستقبلية
و غالبا بيكون فيه زن من الاقارب و المعارف و الاعداء
لاقناعك بالزواج

و غالبا بيكون عليك شكوك لو اتأخر جوازك مع قدرتك المادية عليه

=========
مرحلة ما بعد الزواج
احساسك بالمسئولية الكبيرة اللي هتجيب أجلك
كترة خروجك بره البيت مع انك كنت ملهوف عليها قبل الجواز
اضطرارك الكتير للكذب
غالبا بتأكل اكل اي كلام خاصة في الفترة الاولى
غالبا تُقل دم حماتك
مشاكل كتير بسببب- لا قدر الله- عدم الانجاب
دوشة العيال
و ده جزء من اللي هيحصلك لو ربنا كرمك و الجوازة مشيت
اما - لا قدر الله -حصل طلاق و اللي بيدلعوه بالانفصال
مؤخر صداق
نفقة العيال
حرمان من الرؤية

=======
مرحلة ما بين المرحلتين السابق ذكرهما
و هي مرحلة الخطوبة

أبسط ما يقال عنها انها مرحلة الاشتغالات
الشاب بيشتغل خطيبته و اهل خطيبته
و البنت بتشتغل خطيبها و اهل خطيبها
و الاهل كل منها بيشتغل الاخر

بس اصعب ما فيها ان الاطراف غالبا بتكون مضطرة تتقبل بعض
مش عارف ليه
دي خطوبة

بعض الملاحظات المتعلقة بالزواج

اولا:الخطوبة
ما حدش بيراعي ان الخطوبة دي بتعمل تغييرات حادة في شخصية الخاطب
يعني هيكون مطلوب منه يتكلم بطريقة معينة ،يضحك بطريقة معينة
ده غير المراقبة الدقيقة من اهل البنت
يعني كل همسة بتخضع للتحليل العميق مع وضع احتمالات و تأويلات
طبعا ده غير ان غالبا الخاطب كل خروجاته بتبقى مع خطيبته

و مش لازم طبعا نجيب سيرة الهدايا و المناسبات اللي مالهاش اي لازمة
يعني ممكن تكون البنت عمرها ما احتفلت بعيد ميلادها قبل كده
بس بعد ما تتخطب لازم تحتفل علشان تدبس المحروس في هدية
او تخنق عليه
و غالبا الخاطب بيبقى عارف كل المناسبات اللي بتبقى مكتوبة في الاجندات
و مش بعيد يكون بيهني حماته بعيد وفاء النيل


ثانيا:الزفاف

يعني اجعص امتحان دخله الواحد في حياته ايه؟ثانوية عامة؟بكالوريوس؟
اعتقد ان الضغوطات اللي بتبقى على العريس الايام الاخيرة قبل الدخلة بتكون اكبر
و بعدين باحس ان العريس بيحب يطّمن على كل حاجة بنفسه

و مش عارف ليه معظم الشباب ما بيحبش يحلق شعره الا ظهر او عصر يوم الفرح؟
طبعا غير ان العريس بيبقى ليلة الحنة سهران و طالع عينه

نيجي بقى لما بعد دخول قاعة الفرح
يا عيني العريس بيبقى متوتر و شكله مرهق من اللي شافه

و بعدين ايه الرخامة دي؟
باحس ان القاعة كلها عايزة العريس يرقص
بدأً من الواد بتاع الدي جي مرورا باصدقائه الى ابوه
غير بقى تقطيع التورتة و رزالة الواد اللي بيساعد

طبعا كل ده و العريس متوتر

نسيب ده كله و نيجي لتاني يوم بعد الفرح
طبعا كله عايز يطمن
اهل العروسة غالبا بيشرفوا الصبح
و اهل العريس التليفونات ما بتنقطعش للاطمئنان

مش عارف ايه لازمة ده كله



======
مش لازم أتكلم عن اللي بيحصل بعد الجواز

من الامثال العامية

كتاب الامثال العامية لأحمد تيمور باشا
كتاب جامد جدا


و دي مجموعة من الامثال العامية اللي عجبتني

اللي ينشحت بالبق يتاكل بإيه
البق هو الفم
======
خد من الزرايب و لا تاخد من القرايب
======
توب غيرك ما يخيلش عليك
======
جابوا الخبر من ابو زعبل ان العجايز تحمل
======
جا للعُميّ ولد قلعوا عينه من التحسيس
======
جبت الاقرع يونسني كشف راسه و خوفني
======
جت الدودة تقلد التعبان اتمطعت قامت انقطعت
======
جفن العين جراب ما يملاه الا التراب
======
جلد ما هوش جلدك جره على الشوك
======
الجمال في الصغر حتى في البقر
======
جُور القط و لا عدل الفار
======
جوعه على جوعه خلت للعويل راس مال
======
جوزوا مشكاح لريمه ماعلى الاتني قيمه
======
جيت ادعى عليه لقيت الحيطه مايلة عليه
======
جيت بيت ابويا ارتاح قفلوا في وشي و توهوا المفتاح
======
حاجة ما تهمك وصّي عليها جوز امك
======
الحاوي ما ينساش موت ابنه و الحيه ما تنساش قطع ديلها
======
حِبني و خد لك زعبوط قال هي المحبة و النبوت
======
الحبس حبس و لو في البستان
======
حبله و مرضعه و شايله اربعه و طالعه الجبل تجيب دوا للحبل وتقول يا قلة الدرية
======
تحت البراقع سم ناقع


======

يعني دي شوية امثال عجبتني

و الكتاب تحفة ثقافية

من مشاكل العنوسة للمرأة

كلمة عانس مؤذية نفسيا لكثير من البنات

العانس لو قاعدة في بيت لوحدها يتخاف عليها بعكس الراجل

المعاناة من الكبت الجنسي بالاضافة الى الحرمان من عاطفة الامومة

ازدياد نسبة الاصابة بالعديد من الاورام و خصوصا سرطان الثدي و سرطان الرحم

و غيره
==========

علشان كده ما يتأمروش علينا و يمشوا حالهن

و ده لمصلحتهن

البحث عن كلمة(البرادعي) في جوجل

طب المنوفية...أم طب الزقازيق

هذه فضيحة جامعية احترت فى أمرها. إذا عرضت وقائعها فسيكون ذلك من قبل «نشر» غسيلنا القذر وتشويه صورة الجامعات المصرية فى كل مكان. وإذا صرفت النظر عنها فسيكون ذلك من باب التستر على كارثة من العيار الثقيل. ورغم أنى لست واثقا من أن خيار النشر يمكن أن يوقف الجريمة أو يؤدى إلى محاسبة المسئولين عنها، فإننى رجحته، التزاما بمبدأ سرت عليه منذ زمن هو أنك إذا لم تستطع أن تصلح وضعا معوجا فقد يفيد أن يسلط عليه الضوء لتفضحه.

لقد تلقيت رسالة من الدكتور سالم الديب الأستاذ بكلية الطب بجامعة الزقازيق، قال فيها إنه قبل امتحان البكالوريوس الأخير شكلت لجنة ثلاثية لمتابعة أعمال الامتحان. كان هو أحد أعضائها. وبعد مضى ثلاثة أيام من مباشرتها لعملها أدركت أن ثمة تجاوزات جسيمة تعصف بمصداقية الامتحان، وتحول دون تمكين اللجنة من أداء مهمتها على النحو المطلوب، فاعتذرت عن القيام بما كلفت به، وقدم أعضاؤها تقريرا إلى عميد الكلية سجلت فيه تلك التجاوزات، التى كان منها ما يلى:

تعمد توجيه ممتحنين معينين لامتحان طلاب محددين على نحو يكشف عن رغبة صريحة فى المجاملة ــ الموافقة على أن يغير الممتحنون اللجان، التى تحددت لهم سلفا، ليباشروا مهمتهم فى لجان أخرى، ولا يفسر ذلك إلا بتعمد إشرافهم على امتحان طلاب بذواتهم ليكيلوا لهم درجات لا يستحقونها ــ إجراء الامتحان لطلاب قبل الموعد المحدد لهم، لكى يقفوا أمام ممتحنين معينين لذات السبب ــ إجراء قرعة صورية لتوجيه طلاب معينين إلى من يمنحهم الدرجات النهائية، فى حين طبقت القرعة الحقيقية على آخرين من الطلاب، الأمر الذى يعمق من عدم تكافؤ الفرص مع زملائهم الموصى عليهم ــ فى حالة محددة اختار الأستاذ المشرف على الامتحان عددا محدودا من الطلاب «المحاسيب» لكى يمتحنهم بنفسه بما يضمن حصولهم على الدرجات النهائية ــ فى واقعة أخرى شكلت لجنة بها ممتحنون مختارون لامتحان لجنة محظوظة ضمت طالبات من بنات ذوى الحيثية ــ إن أحد الممتحنين قدم مساعدة مباشرة لطالب كان مطلوبا منه كتابة تشخيص لصور طبية تظهر على شاشة العرض، هكذا بمنتهى الفجاجة والجرأة.

ما أفزعنى فى هذه التفاصيل ليس حدوثها فى الحرم الجامعى فحسب، ولكن أن يحدث ذلك مع طلاب السنة النهائية، الذين يفترض أن يتخرجوا هذا العام وأن يؤتمنوا على صحة المواطنين. ومنهم من سيحصل على درجات التفوق التى تؤهلهم للانخراط فى هيئة التدريس بالجامعة. وقد تحول الفزع إلى ذهول حين رجعت إلى من أعرف من أساتذة الطب، الذين قالوا لى إن هذه الوقائع وأكثر منها معلومة لدى إدارة الجامعة، ولذلك فليس فيها ما يفاجئهم أو يصدمهم.

الذين تحدثت إليهم قالوا إن كلية طب الزقازيق شهدت فضيحة أخرى تسرب طرف منها ثم تم التكتم عليها، خلاصتها أن أحد أساتذة الأمراض الباطنة اكتشف اختفاء ورقتى إجابة تخصان طالبين من «الكونترول»، فسارع إلى إبلاغ النيابة بذلك. وحين انتقلت النيابة لجرد الأوراق وإثبات الحالة، فوجئت بأن الورقتين أعيدتا إلى مكانهما الأصلى فى هدوء. وتبين أن الورقتين كانت إحداهما تخص ابنه رئيس الجامعة، والثانية تخص ابن عميد الكلية، ولم يستبعد أحد أن تكون الورقتان قد أعيدتا كتابتهما من جديد للحصول على الدرجة النهائية. المهم أن الموضوع تم احتواؤه، وأعلنت نتيجة البكالوريوس وكان «المحروسان» من العشرة الأوائل على الدفعة!

ثمة قصة وفضائح أخرى ترسم صورة الكارثة فى طب الزقازيق، التى يروعنى ألا يكون الأمر مقتصرا عليها، إحدى تلك الفضائح أن هذا الذى حدث مسكوت عليه من الجميع، فى حين أنه كفيل بالإطاحة بأكبر الرءوس فى التعليم وفى الحكومة بأسرها، هذا إذا وقع فى أى بلد يحترم العلم أو يحترم مواطنيه، الذين سيكونون الضحايا فى نهاية المطاف.

إن جامعاتنا مشغولة بمنع المنتقبات من دخول الامتحانات، ولا يستوقف مسئولوها وقوع جرائم من هذا القبيل. وهو ما يوفر لنا إجابة عن سؤالين مهمين، هما: لماذا تعيد بعض الدول الخليجية امتحان حملة الدكتوراه من الطب فى الجامعات المصرية؟، ولماذا خرجت الجامعات المصرية من تصنيف الجامعات المحترمة فى العالم؟

ما سبق كان مقالا للاستاذ فهمي هويدي في جريدة الشروق

===========
أما بعد

من واقع مشاهداتي لما حصل امام عيني في كلية طب المنوفية المصونة ممكن احكي كام حكاية
لا تخلو من فساد ربما يكون شبيهاً بما كتبه الاستاذ الفاضل

و انا في سنة اولى كلية و في امتحان نظري كنت باكتب في ورقة الامتحان باقلام ملونة ازرق و اخضر و احمر و اسود
بعدها بشوية جه رئيس اللجنة مشكورا قالي ما تكتبش بألوان غير الازرق احسن يكون كده مخالف و بعدين قالي استنى نسأل
بعدها بشوية جت رئيسة القسم فسألها ردت عليه قالت له ما فيش مشكلة
و بعدين بصت في وشي و قالت :ده حتى هو مش منهم
ما فهمته ان في ناس مهمة انا مش منهم


في سنة رابعة كنا بنمتحن شفوي و بعدين لقيت واحد ابوه استاذ في الكلية و هو المفروض يمتحن معانا في نفس اليوم
بسأله هو امتحن و لا لسه ؟
قالي انا امتحنت امبارح
يعني في يوم مش يومه

في سنة خامسة كان في امتحان عملي لمادة الباطنة و كان معانا أحد المحظوظين في اللجنة
المهم دخل علينا استاذ يمتحنا و الاستاذ ده كان مسافر بره و لسه راجع
فتقريبا ما يعرفش المحظوظ ده
فصاحبنا المحظوظ استأذن من الدكتور اللي بينظم الامتحان و قاله انا عايز اروح الحمام
قاله ماشي بس بسرعة
بعدها بشوية الدكتور اللي بينظم قال للاستاذ
ان الطالب المحظوظ امتحن عند الاستاذ فلان
قام الاستاذ بهز رأسه متفهما الموقف

في السنة الاخيرة كانت استاذة في محاضرة و قالت لنا اللي عايز يتوصى عليه يتوصى عليه بالتليفون
ما يجيبش حد يوصي عليه يوم الامتحان

=======
اللي فات ده انا شفته و سمعته
ده غير اللي سمعته من زملائي و كلامهم ثقة بالنسبة لي

يعني مثلا احد الاساتذة قال لطلاب كانوا بيمتحنوا عنده
الدرجات كلها بتقع تحت ايدينا و بنعمل فيها اللي احنا عايزينه
و كان قصده درجات اعمال السنة و العملي و الشفوي و دي 50 في المية من الدرجة

================
شوية ملحوظات على الهامش
انا ما قلتش الكلام ده و انا طالب علشان العواقب مش مضمونة

مش معنى كلامي ان كل الطلاب اللي بيجيبوا درجات كويسة ان في شبهة فساد في درجاتهم
بالعكس في كتير منهم طلاب شاطرة بجد

انا مش طالب فاشل و حاقد عليهم
========
و كفاية كده علشان انا دمي اتحرق

الاعراض الجانبية لعقار الخطوبة

لاحظتها على كثير ممن اعرفهم

يخطبون

ثم تلاحظ التغيرات التالية

من لم يكن يصلي بيبدأ يصلي-و دي مش حاجة وحشة

اللي بيشرب سجائر او اشياء اخرى بيبطل يشرب- وبرضه مش حاجة وحشة

ثم يبدأ التغير في التفكير

تلاقي الواحد منهم يبدأ ينصح بالزواج و يعدد المزايا

و يحسسك بالضياع لما عليه حالك-طبعا لو كنت عازب

و واحد تاني -غالبا بيكون مش مقتنع باللي خطبها-يقعد يقنعك ان احسن حاجة انك تعمل زيه

مثلا:لو انت خريج كلية اقتصاد و علوم سياسة و عايز تخطب واحدة من نفس الكلية

يجي صاحبنا ده يقولك لا بلاش تاخد من نفس الكلية خد من كلية تانية
و في سره بيقول اعمل زي ما انا عملت و ما تاخدش من نفس المجال

ده غير ان في ناس كتيرة بتحسسنا ان وراهم مسؤليات عظيمة بالخطوبة دي

يعني كل ما تسأل عليه يقولك اصل انا مشغول، اصل كنت مع خطيبتي

و كتير منهم بيبقى خنيق لما يخطب

يعني تلاقيه بيتكلم كده زي كلام السادة الدبلوماسيين

و بيبقى ناقص يقول :ندين و نشجب

و الواحد مش عارف

لو خطب هيبقى زيهم؟؟؟؟؟

ملحوظة: الشيء الغريب ان اللي بيتجوز منهم يقولك - لو انت لسه عازب- ما تستعجلش و خد وقتك
في التفكير
========

نسأل الله العافية

معدل البحث عن كلمة عمرو دياب في محرك جوجل